شوية ضيق

لما بأكون مضايق من حد بأحبه.. يا بألومه قوي، يا بأحاول أعمل حاجة تبسطه قوي، و لما اشوف فرحته بأنسى زعلي منه ، و بأفرح لفرحتـه.

وحشتنــي

غريب لما شخص يوحشك قوي لمجرد إنك مشوفتوش يوم أو يومين. الأغرب إنه بيوحشك أكتر لو إنت مستنيه و إتأخر عليك و لو 5 دقايق، يمكن لأنك عارف إنه جاي ، أو لأنك موجود عشانه و من غيره وجودك ملوش قيمة.

كتير الواحد في علاقاته بالناس حواليه بيتقّل العيار حبتين، و يوهمه خياله المريض إن لأن فلان بأرتاح معاه و بأحب أشوفه و أسمعه و هوّه جنبي أو حتى و هوّه بعيد إنه المفروض يحس بيّا في كل لحظة، و أنا تعبان وأنا لوحدي و أنا محتاجله، و أزعل منه لمجرد إنه معملش حاجة ولا حتى سأل.

If I should stay

I would only be in your way

so I'll go

but I know

I'll think of you every step of the way

And I will always love you

bitter sweet memories

That is all I am taking with me

we both know

I'm not what you need

And I hope life treats you kind

and I hope you have all you dreamed of

And I wish you joy and happiness but above all of this I wish you love

and I will always love you, Will always love you

I'll Always Love You by Whitney Houston

شخوص

حياتنا ملهاش طعم لو كنا عايشين لوحدنا و رغم الحقيقة دى داء الإنسانية الأزلي هوه الأنانية، و أنا كفرد من زمان عاوز أسجل شخصيات عزيزة عليّا منهم إللي لسة على علاقة بيهم و منهم إللي فرقنا البحر أو التراب بحكم إن لولا الناس دى مكونتش حأبقى كده ولا كان مقهى الوطن.

شافعي" حبيبي دائماً"
اتقابلنا في أولى ثانوي في جمال عبد الناصرمن عشر سنين و شوية و ده أيام ما كانت عبد الناصر فائقين و أيام ما كانت بنين.
كنّا في 1\2 فصل فائقين. و كنّاش نعرف بعض في الترم الأول بس على أخره بقينا نتكلم مع بعض أيام م كان كلامي قليل، و في الترم التاني خلينا التختين تاني صف في النص تلاتة بمشرف حضرتي إلا جواره. و ابتدينا نروح و نيجي مع بعض و اتفقنا إننا نتقابل 7:05 تقريبا كحل وسط و كل واحد جه على نفسه في أول تضحية عشان نبقى مع بعض.. حيث إن عمو شافعي كان بيروح 6:45 و أنا حوالي 7:20 أو يمكن و نص كمان.
طبعاً أنا و شافعي مبنختلفش إن أولى ثانوي من أحلى سنين عمرنا رغم إننا مكناش بنخرج ولا حاجة لكن لأن ذكرياتنا عنها لدلوقتي بنضحك عليها و نفتكر إللي كان بيحصل، و إن الزمن لو يرجع بينا كانت حاجات كتير اتغيرت.
صعب قوي أكتب عشر سنين في كام سطر، لكن حألم الموضوع مؤقتاً إننا فاهمين بعض جداً و متفاهمين بدرجة شديدة و زي الإخوات و أكتر رغم إن شخصياتنا و أرائنا بتختلف كتير. لكن عمرنا مزعلنا من بعض إلا من موقف صغنن و عدا في لحظتها و كانت اعصابي تعبانة شوية وقتها و عايش موقف معين و أنا الغلطان لأني محستش إن كلامي ممكن يضايقه، و كفاية إن غلطة حياتي حصلت لما كان اخونا شافعي بيطبخ في الأردن و إن كل أصحابي من عبد الناصر كانوا عن طريق شافعي و كنا دايما بنتقابل تحت بيته بيت الأمة حتى الكام درس بتوع ثانوي كانوا في بيته.
يتبــع

فرحـة

ساعات كتير بأحس إني فرحان من جملة قريتها أو حاجة قلتها أو نجاح حققته، لكن أحلى فرحة حسيتها لمّا شوفت الفرحة في عيون ناس قريبة منّي و حسيت إن الكون بيشاركهم الفرحة دى.
تخيل بقى لو إنك كنت سبب صغيّر في الفرحة دى؟

بورترية..

غريب لما الواحد يلاقي نفسه بيحب بورترية شافه، ويبقى نفسك تبقى جزء من الصورة دى.
غريب لما البورترية ده يبقى مجرد إحساس تحس لما تشوفه إن كل حاجة حواليه ساكته بتسمعه و تتمنى إن الساعة تسكت خالص و يفضل الإحساس ده. تزعل من نفسك قوي لما تحاول تفهم الصورة عن طريق الكلام أو تعلق عليها بصوتك و إنك خرجت من جمال الصورة و بوّظتها. لما تحس إنك عاوز تبقى مجرد هواء بتتفرج على الصورة دى و قد إية إحساسها صادق بطريقة اتنقلت لكل حاجة حواليها حتى إنت . قد إية الإحساس صادق و بسيط، قد إية الفكرة رغم بساطتها مش موجودة
إلا في بورترية.

إهــداء
إلى أول من اهتمت أن تقرأ عجزي و لم آسي أن تقرأه.

س: عرف العجز..؟
ج: إنك متعرفش تعمل إللي إنت عاوزه، و ده إللي ساعات كتير بأحسه زي دلوقتي مثلاً عاوز أكتب و إن كنت مسكت القلم و أديني بأملا السطور لكن من غير معنى، من غير م أكتب إللي عاوز أكتبه، إللي مش عارف أحدده. و ده إحساس تاني بالعجز.

س: عرف العجز..؟
ج: إنك يبقى فيه حاجة معينة عارف إنك عاوزها من غير م تقدر تحدد الحاجة دى. و ده إللي بيحصل في كتابتي دلوقتي، عاوز أكتب و بأكتب، لكن مش حاسس إني كتبت إللي مسكت القلم و شخبطت ع الورقة عشان أكتبه عشان أحس بنوع من الهدوء أو الراحة أوself-esteem و بعدها أكتب النهاية. بالضبط self-esteem و إن كنت مش عارف معناها بالعربي و ده نوع نوع تالت من العجز.

س: عرف العجز..؟
ج: إنك إنك تبقى عاوز حاجة معينة من غير م تعرف تحددها بالحروف أو توصفها بطريقة ملموسة.

أديني بفضفض مع نفسي و الورق عمره م قاللي لأ، ساعات بيتوه مني في الدرج لكن دايماً موجود ، و اخينا القلم نفسه يتوه مني في الدرج لكن دايماً موجود. المشكلة في صاحبنا إللي بيكتب إنه عاجز.
إنتهى
22-3-2008

ليـــه..؟

1. كلام كتير بأحوشه ليكي لكن مقلتوش، كنت حاسس دايما إنك هنا و عمرك محتبعدي و ساعة الفراق ملقتش غير بحبك بس برضه مشيتي.

2. ليه أقرب الناس لينا بنختصر مشاعرنا بهم في كوباية شاي و حتة كيك قدام التليفزيون و م بنفتكرهمش إلا و إحنا زعلانين بنبقى عاوزين نبكي في حضنهم عاوزين نشكيلهم و نرتاح أول م بنشوف بسمتهم و حنان نظراتهم مغطينا و مهما كانت المشكلة صعبة حبهم أقوى.

3. بأقل الحروف بأكون مطمن إنه جنبي و مش حيسيبني ولو بعيد أي وقت حتسمع صوته على الخط مهما كان الوقت متأخرو لو بقاله شهور مسمعش صوتك و رغم إنه عارف إنك بتحبه لكن عمره م استنى إنه يسمعها منك ولا سألك أي مقابل لحبه ليك بل و ممكن تضايقه و تكون فظ معاه و إنت عارف إنه عمره م حيزعل منك لأنه عارف إنك طيب، عارف إن أبو حميد حيفضل في عنيه أبو شرط كحلي و فانلة مخططة بالعرض أصفر في أزرق.

4. ليه الإنسان الغريب عنك أسهل كلمة على لسانك تكون بحبـك و لو من غير متحس بالكلمة ولا هوه حسها لكن بلّعها بشوية ميّة، يمكن لأنك متأكد إنه مفيش سبب يخليه يقعد جنبك و يسمعك إلا إنك تكون بتحبه و تسأل عليه في كل وقت و تكرس حياتك عشانه على أمل إنه يحس بيك و مشواركم يبقى واحد.

5. و إنتي جنبي من غير كلام كنت مطمئن إني حألف راسي ألاقيكي كنت عارف إنك هناك عند إلتفاتتي. دوما هناك ببحر عينيك و هدوئك الذي أتمناه للعالم و موسيقى روبرت ميلز و شخبطك على الورق و المحاضر يلقي، أجلس على مكتبي أفكر في أحلامي الصغيرة و عندما جلسنا ساعة معاً لم أتحدث عني ولا عنك. ورغم كوني لا أعرفك أحب غموضك ربما لأني أعلم إنه متى تحدثنا عنا سندرك كوننا بشر و أن الكيان الرقيق الذي يجلس خلفي سألتفت يوما ما و لن أجده هناك.

أوائل مارس 2008

غريـب

غريب إن الواحد يحس إن نفسه وحشاه، نفسه يرجع للطفولته و مدرسته لمة الصحاب و هم بيزاولوا بعض و الكلام على مين النهاردة و كله بيدافع عن كرامته بس على مين.
غريب إنك متلاقيش حد تكلمه ولا حتى نفسك.
غريب إنك تبقى عاوز تكلم شخص بعينه ولما تشوفه تسأله عامل إية و تقعد تتكلم عن نفسك.
غريب إن المواضيع الخاصة أو المهمة مبتجمعش غير اتنين أو ثلاثة بالكتير و لما تبقوا أربعة خمسة تقلب هزار و مألسة.
غريب إن الواحد مبيحبش إلا بنت شافها.

فرحـــان

الواحد كان بقاله كتير مفرحش كده، محسش إن الأمور ماشية كويس أه فيه حاجات ملخبطة بس الحياة من غير لخبطة متبقاش حياة.
من كام يوم كده الواحد صحي من النوم في قمة سعادته و كل ده لأنه شاف حلم صغنن كده و دمه خفيف و رغم إني قمت متأخر و كان عندي سبعين مشوار إلا إني كنت فرحان قوي رغم إني عارف إنه مجرد حلم ممكن يكون ليه معنى و يمكن لأ ، يجوز سعادتي كانت لأني أخر مرة حلمت فيها على ما أذكر كانت أوكازيون كوابيس خدت فيه أربعة بدل واحد. بس الغريب المرة دى إني م اتلككتش ومحاولتش أرجع أنام تاني عشان أكمل الحلم اللذيذ ده يمكن لأنه كان تلقائي قوي زي ولد و بنت إيديهم النونو في حضن بعض و البنت في إيدها التانية بالونة رسمهم ولد صغير اسمه أحمد.

مجنون

-1-
يا ماشية وحدك..
بطريق الوهم المتفاني
أرى عينان كعينيك
بطريقي..
تسألني..
إن كنت أحب و لا أدري..؟!

-2-
تعانق عيناى الطرقات
كي لا أرى عينيك..
في المارات
تسألني..
تهجرني..؟!
و تنسى الحب.. في النظرات..؟!
أفي القلب أخرى..
أم أخريات...؟

-3-
مرت سنين
أصبح في يدي دبلة
و على جبين أخرى..
قبلة..
و تم الزواج.

-4-
معي الأن.. أطفالا
و زوجة....
ضحك الفم عليّ
و ما أكتب
و ذرف القلب دمعة..
عليك و ع الفتيات..
ليلى..
بثينة..
وعزة....
11-7-04

بندق و لوزة

دايما لساني بيتقل كل م أتكلم معاكي شفايفي بتقول كلام بأستغربه ،بأقول كل حاجة غير إللي جوايا و بأقضي وقتي الصغير معاكي كزملاء في الشغل في لحظات كلامنا بين زحمة الشغل و أنا سرحان في إنها متبقاش مجرد دقايق تخلص مع كوباية الشاي على المكتب
م أعرفش هل حييجي يوم و أكلمك بصراحة في كل ده؟؟
طب و هوه إية إللي حأكلمك فيه أصلاً ، أنا نفسي مأعرفش. فاتت سنة و شوية بأحس إني عاوز أشوفك كل يوم ، و أتكلم معاكي، ساعات بأكتفي إنك تشوفيني من طرف المكتب و أنا غرقان في ملفاتي.
لكن هل كل ده له معنى؟ بأخاف عليكي بجد و زي مقلتي يوم م سألتي عليّا يوم تعبي "متقولش كده إحنا إخوات" أنا كنت مستغربها يومها لكن بعد كده حسيت إني خايف عليكي زي أختي الغلباوية الصغيرة و أنا بأحب إخواتي و بأخاف عليهم و بأحاول أكون جنبهم على قد م أقدر، يمكن زمان مكونتش حاسس بيهم فكنت عاوز أعدي البحر و أسافر، دلوقتي السفر بقى ليّا عبارة عن فلوس و بس، لكن لو فضلت هنا حأفضل جنبهم على الأقل الشوية إللي فاضلين و قبل م نفترق بأبقى على الأقل عاوز أشوفهم و أحكي معاهم من وقت للتاني ده أنا حتى كلمتهم عنك و ده إحساسي بيكي بالضبط. حتقولي إني م أعرفش عنك كتير لكني برده م أعرفش عن إخواتي كتير و الدنيا غصب عننا سفر و ساعات بأشوفك جنبي في سفري. لكن لما سألتيني إنتي عندي إية مقدرتش أقول بحبـك لأني مأعرفش يعني إية حب، لكني عارف إني بأخاف عليكي قوي.. ليه مأعرفش.

و نتمنى لكم الصبر و السلوان

أخطيء كثيرا في حق نفسي و فيمن حولي، أخطيء في تبرير أفعال الأخرين و أفسرها على هواي، و كل مرة عندما أكتشف خطأي أظنها الأخيرة و ألوم نفسي أن الخطأ كان مجرد (غلطة و مش حتتكرر تاني) و يتكرر الخطأ، و كما ينصحني صديقي دوماً" الفطن من يتعلم من أخطاء الأخرين و الكيّس من تعلم من أخطائه و الجاهل هو من لا يتعلم من أخطاؤه" و رغم علمي إني لست بجاهل و لكني لا أتعلم من أخطائي ربما لأنني كثير النسيان .لكن ما علاقة كل هذة المواعظ بعنوان المدونة؟ لا شيء سوى إني أخطأت في حق فتاة ما كان من الممكن أن نقاسم لحظات جميلة سويا و ثبت خطأي الشنيع و من ثم سألت الله الصبر و أظنه عليّ هين و سألته السلوان و أعتقده أصعب من الصبر مرات و مرات فهل سأسلوها و كيف سأذكرها فيما بعد و كل الحظات الجميلة التي اقتسمناها و كل الأشياء البغيضة التي حدثت و إن سلوتها فهل سأسلو ما أعيشه و ما سأعيشه و أسلو مع كل هذا مشاعري و نفسي؟؟

اللهم أشكو إليك ضعفي و قلة حيلتي و هواني على الناس

كومبارس

كتير بأشوف نفسي حدوتة، و رغم إنها عني لكن دوري فيها كومبارس. بأشوف نفسي في السينما و أصفق لي و أعيط معايا و ساعات بأضحك عليّا و أشتمنى.

معلش يا جمهور و يا ممثلين، نفختكوا معايا ،بس المخرج عاوزني أبقى تقيل و كلامي قليل ويطلع في التلفزيون يقول على الله الفيلم يعجبكوا.!! وبس